د فراه لوړو زده کړو مؤسسې ته د لوړو زده کړو وزارت معين دوکتور لطف الله خيرخواه سفر وکړ!
د لوړو زده کړو وزارت معين دوکتور لطف الله خيرخواه او ورسره مل پلاوي د فراه لوړو زده کړو مؤسسې ته د سفر په ترڅ کې په ياده مؤسسې کې د عاليې او عالميې دورې فاضلانو د ازموينې لړۍ څخه ليدنه وکړه او د فراه لوړو زده کړو مؤسسې رئیس، علمي او محصلانو چارو مرستیال، مالي او اداري چارو مرستیال، پوهنځيو رئیسانو او استادانو سره د غونډو په سالون کې د يادې مؤسسې لاسته راوړنو او ستونزو اوريدلو په موخه ناسته وکړه.
ناسته د مولوي شاه ولي اللّٰه محمدي لخوا د قرآن کريم په څو مبارکو اياتونو سره پيل سوه.
لومړۍ د فراه لوړو زده کړو مؤسسې رئیس مولوي سميع الله حقاني د لوړو زده کړو وزارت معين دوکتور لطف الله خيرخواه ته د علم په ژبه ښه راغلاست ووايه او د لوړو زده کړو وزارت معين د راتګ څخه يې مننه وکړه.
وروسته د لوړو زده کړو وزارت معين دوکتور لطف الله خيرخواه په افغانستان کې د علم او پوهې د ارزښت او اهميت په اړه لنډه وينا وکړه.
بيا د فراه لوړو زده کړو مؤسسې علمي او محصلانو چارو مرستیال پوهنيار عبدالبصير رحماني د لوړو زده کړو وزارت معين ته ښه راغلاست ووايه او د يادې مؤسسې پنځه ګونو پوهنځيو لاسته راوړنې او ستونزې يې ورسره شريکې کړي.
او په پای کې د لوړو زده کړو وزارت معين دوکتور لطف الله خيرخواه د فراه لوړو زده کړو مؤسسې لاسته راوړنې وستايلې او د ستونزو په برخه کې يې د هر اړخیزو همکاریو ډاډ ورکړ.
او ناسته د شرعياتو پوهنځي رئیس مفتي فيض الله فيضان لخوا د خير په دعا سره پای ته ورسيده.
