فراه لوړو زده کړو مؤسسې کې د شپږو علمي برنامو د نصاب نيازسنجی ترسره شول!
فراه لوړو زده کړو مؤسسې کې د شپږو تحصیلي برنامو د نصاب نيازسنجي د نصاب او کریکولم مرکزي کمېټې په همکاري ترسره شول. د دې برنامې په غونډه کې د يادې مؤسسې علمي او محصلانو چارو مرستیال پوهنمل عبدالبصير رحماني، د پوهنځيو رئیسانو، آمرينو، استادانو، اړوند ګمارنکو، فارغانو او محصلانو ګډون درلود.
لومړی غونډه د قرانکريم په څو مبارکو اياتونو سره پيل شوه.
وروسته علمي او محصلانو چارو مرستیال پوهنمل عبدالبصير رحماني د غونډې ګډونوالو ته د تحصيلي نصاب د نيازسنجی په اړه هر اړخيزه معلومات وړاندې کړل.
ورپسې د ښوونې او روزنې، کرنې او اقتصاد پوهنځیو شپږو علمي برنامو(څانګو) تحصيلي نصاب د نيازسنجی سمينار په عملي توګه د هرې څانګې د آمر لخوا اړوند کارګمارنکو، فارغانو، محصلانو او استادانو ته وړاندې شو.
وروسته د نصاب او کریکولم مرکزي کمېټې ټاکلي شوي پوښتنپاڼې د څلور کتګوري ګډون کوونکو ته وویشل شول او د هغوي نظریات او وړاندیزونه یې د اوسني نصاب په اړه وپوښتل او په دې سره د نن ورځي سمینار او نيازسنجی پای ته ورسید.
له دې وروسته به د فراه لوړو زده کړو مؤسسې نصاب او کریکولم کمېټې په مرسته هره څانګه خپل د پوښتنپاڼو تحلیل ترسره کوي او پایله به یې د يادې مؤسسې علمي او محصلانو چارو معاونیت او وزارت سره شریکه کړي.
