فراه پوهنتون کې د داخلي اړیکو لپاره د «BeeBEEP» پیغامرسوونکي سافټویر د معرفۍ سمینار ترسره شو
د فراه پوهنتون برېښنايي زدهکړو اصلي کمېټې له لوري د یاد پوهنتون استادانو او اداري کارکوونکو ته د «BeeBEEP» په نوم د داخلي پیغامرسوونکي سافټویر معرفۍ سمینار ترسره شو. د دغه سمینار موخه د پوهنتون د داخلي اړیکو سیسټم معرفي کول، د یاد سافټویر د کارونې له څرنګوالي سره د ګډونوالو بلدتیا، د ادارې بېلابېلو څانګو ترمنځ د همغږۍ پیاوړتیا، د معلوماتو تبادلې چټکتیا او د اغېزمنو اړیکو رامنځته کول وو.
سمینار د قرآن کریم د څو مبارکو آیتونو په تلاوت سره پیل شو.
وروسته د برېښنايي زدهکړو اصلي کمېټې غړي، پوهنیار محمود اسحاقزی، ګډونوالو ته د BeeBEEP داخلي پیغامرسوونکي سافټویر د ځانګړنو، امکاناتو او د کارونې طریقې په اړه هر اړخیز معلومات وړاندې کړل. نوموړي څرګنده کړه چې دغه سافټویر د فراه پوهنتون د داخلي اړیکو لپاره له انټرنېټ پرته د پوهنتون د داخلي شبکې (LAN) له لارې د استادانو او اداري کارکوونکو ترمنځ د پیغامونو، اسنادو، فایلونو او اداري خبرتیاوو د چټکې، اسانه او خوندي تبادلې زمینه برابروي.
همدارنګه ټینګار وشو چې د کاروونکو ټول معلومات او اړیکې د پوهنتون په داخلي شبکه کې په خوندي ډول تبادله کېږي او د دې سیسټم کارول به د ادارې د همغږۍ په پیاوړتیا، د معلوماتو د لېږد په چټکتیا او د اداري چارو په اغېزمنتیا کې مهم رول ولوبوي.
ورپسې ګډونوالو ته د یاد سافټویر د نصب، لومړنیو تنظیماتو، د کارنحساب د جوړولو او عملي کارونې څرنګوالی په عملي بڼه وښودل شو او د هغوی پوښتنو ته لازم ځوابونه وړاندې شول.
په پای کې د داخلي اړیکو د سیسټمونو د کارونې، د ادارې د بېلابېلو څانګو ترمنځ د همغږۍ د پیاوړتیا او د اداري خدمتونو د کیفیت د لوړولو پر اهمیت ټینګار وشو او سمینار د خیر په دعا سره پای ته ورسېد.
