فراه پوهنتون کې په (شرعي علومو کې د معیاري څېړنې پرمختللي بېلګې) تر سرلیک لاندې علمي او ښوونیز سمینار ترسره شو
د فراه پوهنتون شرعیاتو پوهنځي له لوري، د استادانو مسلکي پراختیا آمریت په همکارۍ، د یاد پوهنتون استادانو لپاره په (شرعي علومو کې د معیاري څېړنې پرمختللي بېلګې) تر سرلیک لاندې علمي او ښوونیز سمینار ترسره شو. د دغه سمینار موخه د استادانو د علمي او څېړنیز ظرفیت لوړول، په شرعي علومو کې د معیاري څېړنې له نوېو لارو چارو او بېلګو سره د هغوی بلدتیا او په اکاډمیک چاپېریال کې د معیاري څېړنې فرهنګ پیاوړی کول وو.
سمینار د قرآن کریم د څو مبارکو آیتونو په تلاوت سره پیل شو.
وروسته، نوماند پوهنیار صبور خیرمحمدزاده په شرعي علومو کې د معیاري څېړنې د اصولو او بنسټونو، د څېړنې د نوېو میتودونو، د علمي څېړنو د تدوین طریقو او د څېړنیزو آثارو د لیکلو د اساسي معیارونو په اړه هر اړخیز معلومات وړاندې کړل. نوموړي همدارنګه د مناسبې څېړنیزې موضوع د ټاکلو، د څېړنې د پوښتنو د تنظیم، له معتبرو سرچینو څخه د ګټې اخیستنې، د علمي امانتدارۍ د اصولو د رعایت او په څېړنو کې د سمې حواله ورکونې په اړه لازمې څرګندونې وکړې.
د سمینار په ترڅ کې ګډونوال د پرمختللو څېړنیزو بېلګو، د علمي سرچینو د تحلیل او ارزونې له لارو چارو، د معیاري علمي مقالو او څېړنو د لیکلو له اصولو او د شرعي علومو د پراختیا او د لوړو زده کړو د کیفیت په لوړولو کې د علمي څېړنو له ارزښت سره بلد شول. همدارنګه د اصیلو څېړنو پر ترسره کولو، د علمي معیارونو پر رعایت او د استادانو ترمنځ د څېړنې د روحیې پر پیاوړتیا ټینګار وشو.
په پای کې د ګډونوالو پوښتنو ته ځوابونه ورکړل شول او سمینار د خیر په دعا سره پای ته ورسېد.
