د فراه پوهنتون فراه علمي ـ څېړنیز ژورنال د خپلو علمي مقالو لپاره د DOI نړیوال کوډ ترلاسه کړ
د فراه پوهنتون فراه علمي ـ څېړنیز ژورنال د خپلو علمي او څېړنیزو مقالو لپاره د ډیجیټل څیز پېژندونکي (Digital Object Identifier – DOI) نړیوال کوډ 10.67753/DOI ترلاسه کړ. د دغه نړیوال کوډ ترلاسه کول د ژورنال د علمي اعتبار، نړیوال پېژندنې او معیاري کېدو په برخه کې یوه مهمه لاسته راوړنه بلل کېږي.
د DOI کوډ په ترلاسه کولو سره به د فراه علمي ـ څېړنیز ژورنال هره خپرېدونکې مقاله یو ځانګړی او ثابت نړیوال پېژندونکی ولري، چې له امله به یې څېړونکي او علمي مینهوال وکولای شي د ژورنال مقالې په نړیواله کچه په اسانه ومومي او ورته لاسرسی ولري.
همدارنګه، دغه کوډ د مقالو د دقیقې پېژندنې، علمي مراجعو د تنظیم او د لیکوالانو د علمي اثارو د حقوقو د خوندي کولو په برخه کې مهم ارزښت لري.
د یادونې وړ ده چې د فراه علمي ـ څېړنیز ژورنال د نړیوالو علمي او څېړنیزو پلاتفورمونو په یو شمېر مهمو ادرسونو، لکه Academia، Zotero، ORCID، Google Scholar، Google Search Console او Afghanistan Scientific Journal کې هم ثبت او انډیکس شوی دی. دغه ژورنال د ISSN-P: 3105-0956 او ISSN-e: 3135-6117 نړیوال معیاري سریال شمېرې هم ترلاسه کړې دي.
د فراه پوهنتون د څېړنې او علمي مجلې آمریت په پام کې لري چې د ژورنال د علمي معیارونو د لا لوړولو، نړیوال اعتبار د پیاوړتیا او د څېړنیزو فعالیتونو د پراختیا په برخه کې خپلو هڅو ته دوام ورکړي.
