د فراه لوړو زدهکړو مؤسسې ته د لوړو زدهکړو وزارت د تضمین کیفیت او اعتبار ورکولو ریاست څخه د هيئت راتګ
سهشنبه په ۲ / ۸ / ۱۴۰۲ نېټې باندې د فراه لوړو زدهکړو مؤسسې ته د تضمین کیفیت او اعتبار ورکولو ریاست د رئيس ښاغلي استاد شاکر وحیدي په مشرۍ او ورسره مل پلاوي د یادې مؤسسې او د فراه ولایت د نورو خصوصي لوړو زدهکړو مؤسسو د تدریسي، علمي او تضمین کیفیت د چارو د کتنې او مشورې ورکولو په موخه تشریف راوړی و.
نوموړي پلاوي په لومړي ورځ کې د فراه لوړو زدهکړو مؤسسې د لابراتوار، کتابتون، کمپیوټرلب، ورزشي او فرهنګي جمنازيوم او نورو شته امکاناتو څخه لیدنه وکړه او په دویمې ورځې یې د مؤسسې د تضمین کیفیت، استراتیژیک پلان او تحقیق د اصلي کمېټو او ځېنو آمریتونو د ترسره سوي کارونو څخه لیدنه وکړه او د نېکو او لازمو مشورو ترڅنګ یې د هغوی نیمګړتیاوې په ګوته کړل.
ورورسته یې د ځېنو تدریسي ټولګیو د لیدنې پر مهال د استادانو تدریس او د محصلانو شته ستونزې او وړاندیزونه په ورین تندي واوریدل او ژمنه یې وکړه چې یاد وړاندیزونه د لوړو زدهکړو وزارت مشرتابه ته رسوي او د عملي کېدو هڅې به یې نهسپموي.
د فراه لوړو زدهکړو مؤسسې په ورزشي او فرهنګي جمنازيوم کې د یاد پلاوي د ښه راغلاست په پار، پرتمینه غونډه په لار اچول شوې وه، چې د فراه لوړو زدهکړو مؤسسې استادانو، اداري کارکوونکو او محصلانو په کې ګډون درلود.
غونډه د قرآنکريم په تلاوت سره پيل سوه. په لومړي سر کې د فراه لوړو زدهکړو مؤسسې رئیس ښاغلي مولوي سمیع الله حقاني، راغلي هیئت ته ښه راغلاست وویل او د تضمین کیفیت د پروسې پر چټکتیا او مختهوړلو په برخه کې تر ډېره چمتووالی وښودل.
په وار سره د تضمین کیفیت ریاست رئیس ښاغلی استاد شاکر وحیدي حاضرینو ته وینا وکړل. نوموړي په خپلو خبرو کې وويل: دا اسلامي نظام په ډېرو قربانيو په لاس راغلی او ساتل یې زموږ او تاسو لوستي/ باسواده او علمي قشر دنده ده. همدارنګه د تضمین کیفیت په اړه یې زیاته کړه، چې تضمین کیفیت یوه داسې پروسه ده، چې سم کار په ټاکلي وخت کې ترسره کړو. ښاغلي وحیدي صاحب په پای کې د فراه لوړو زدهکړو مؤسسې رهبري، آمرینو، استادانو، کارکوونکو او محصلانو ته د خوشحالۍ زیری ورکړ او دا یې وويل چې له نېکهمرغه یادې مؤسسې د تضمین کیفیت د لومړي پړاو لپاره پوره تیاری نیولی او انشاالله چې موږ به ډیر ژر خپل ټیمونه د ارزونې لپاره ولیږو، تر څو یاده مؤسسه د لومړي پړوا تضمین د خپلو هڅو په پایله کې ترلاسه کړي.
یاده غونډه د خیر په دعا سره ختمه سوه.
