فراه د لوړو زدهکړو مؤسسې په کچه د تحصیلي نصاب په تړاو د اړوندو ادارو د نظر غوښتنې یو ورځنی علمي سمینار دایر سو
نن یکشنبه د ۵ / ۵ / ۱۴۴۵ کال سپوږمیزه نېټه چې د ۲۸ / ۸ / ۱۴۰۲ لمریزې نېټې سره سمون خوري، د فراه د لوړو زده کړو مؤسسې په ورزشي او فرهنګي جمنازیوم کې فراه د لوړو زده کړو مؤسسې په کچه د تحصیلي نصاب په تړاو د اړوندو ادارو د نظر غوښتنې یو ورځنی علمي سمنیار د نصاب او کریکوکم د اصلي او فرعي کمېټو له لوري د فرهنګي او نشراتو کمېټې په مرسته وړاندې سو.
په دې سمینار کې د اقتصاد، زراعت، پوهنې، تجارت او صنعت، حج او اوقاف، امر بالمعروف او نهی عن المنکر، محکمې، ښاروالي او اطلاعات او کلتور او د نورو ریاستونو استازو، د پوهنتون رئیس، علمي او محصلانو چارو مرستیال، د څلورګونو پوهنځیو رئیسانو، د څانګو آمرینو، د کمېټو مسؤلینو، برحال او فارغو محصلانو په کښې ګډون کړی و.
سمینار د قرآنکریم په تلاوت سره پیل سو. د غونډې لومړی ویناوال د فراه د لوړو زده کړو مؤسسې رئیس ښاغلی سمیع الله حقاني و، نوموړي خپل په وینا کې وویل: تحصیلي نصاب باید د ټولنې د اړتیاوو مطابق ترتیب سي او د پردو له تحریفاتو محفوظ پاته سي. ورپسې د نصاب او کریکولم کمېټې مسؤل پوهنیار ابراهیم سلطاني یاد سمینار معرفي کړ او د دې سمینار په ارزښت او ګټو باندې مفصلې خبرې وکړي، وروسته پوهنیار محمد حسین میاخېل د ښوونې او روزنې پوهنځي د نصاب او کریکولم کمېټې مسؤل دا یاد کړل: چې یو د علم تیورې ده او بل د علم توظیف دی، د علم توظیف لپاره په کار ده، چې په مسلکي برخو کې وخت په وخت پرمختګ او بدلون راسي او وروسته د ښوونې او روزنې پوهنځي کریکولم یې ارائه کړ.
په وار سره د اقتصاد پوهنځي استاد ښاغلي پوهنیار محمد عظیم نورزاد او د شرعیاتو پوهنځي استاد ښاغلي نوماند پوهنیار امان الله المصاحب د خپلو پوهنځیو نصابونه یې د سمینار ګډونوالو ته وړاندې او تشریح کړل، چې له بدهمرغه د وخت د کمښت له مخې د کرهنې پوهنځي د نصاب کمیټې مسؤل ښاغلي پوهنیار نصیر احمد نصرت ته وخت ملتیا ونهکړه ترڅو خپل پرزنتیشن ارائه کړي او له دوی څخه عفه او معذرت وغوښتل سو.
د سمینار په دریمه برخه کې ټول ګډونوال ټاکلو ځایونو ته ولاړل او د ګروپونو په ډول سره یې د هرې پوهنځي پر نصاب او کریکولم کتنه وکړه، وروسته یې خپل نظریات او مشورې په لیکنې ډول د نصاب مسؤلینو ته وسپارل.
په پای کې ټولو ګډونوالو ته ګډونلیکونه ورکړل سول او غونډه د خیر په دعا سره پای ته ورسیدله.
فرهنګی او نشراتو کمیټه
