د فراه لوړو زدهکړو مؤسسې د علمي - څېړنیز ژورنال پیل په تړاو د مقالو ټولغوښتنې غونډه
شنبه د ( ۱۴۰۲ ل) کال د ميزان پر (۸) مه نېټه د فراه لوړو زدهکړو مؤسسې په ورزشي جمنازيوم کې يادې مؤسسې د علمي - څېړنيز ژورنال د پيل په تړاو د مقالو ټولغوښتنې غونډه ترسره شوه، چې په کې د بېلابېلو ادارو رئيسانو، استادانو او زدهکړيالانو ګډون کړی وو.
غونډه د قاري صبغت الله نوري لخوا د قرآنکريم د څو مبارکو آیتونو په تلاوت سره پيل شوه. وروسته د فراه علمي- څېړنیز ژورنال مسؤل مدير ښاغلي پوهنیار جواد افغان وینا وکړه، د نوموړي په وينا په علمي او اکاډميکو ډګرونو کې د څېړنې ارزښت ته په کتو يې په ياده مؤسسه کې د څېړنيز ژورنال د پيل لپاره هڅې وکړې تر څو د ياد علمي ژورنال د فعاليت جواز د لوړو زدهکړو وزارت څخه تر لاسه او په عملي ډول يې په فعاليت پيل وکړي.
د نوموړي د دې علمي- څېړنیز ژورنال څخه موخه د استادانو او څېړونکو د څېړنو خپرول ياد کړل او په پای کې يې د ښاغلي وزیر صاحب شیخ ندا محمد ندیم او د فراه لوړو زدهکړو مؤسسې رئیس مولوي صاحب حقاني څخه مننه وکړه، چې د دې مجلې په فعالولو کې هڅې او هلې ځلې کړي دي.
وروسته د علماوو شورا مالي او اداري مرستیال ښاغلي شیخ الحدیث والتفسیر مولانا عبدالقوي حقاني د غونډې ګډونوالو ته وینا وکړه، نوموړي خپلو خبرو کې وویل: یوه ټولنه بغیر له څېړنې پرمختګ نسي کولای او محقق باید د ټولنې اړتیا او شرایطو ته په کتو څېړنه وکړي.
وروسته د اطلاعاتو او کلتور رئیس ښاغلي مولوي عبدالحی سباوون هم د علم او څېړنې د ارزښت په هکله خبرې وکړې.
د غونډې په پای کې د فراه لوړو زدهکړو مؤسسې رئیس مولوي سميع الله حقاني وینا وکړه، ښاغلي حقاني ټولو راغلو مېلمنو، استادانو او محصلانو ته ښه راغلاست ووايه او ياد ژورنال يې د مؤسسې لپاره ستره لاسته راوړنه وبلله. نوموړي د اسلام له اړخه د څېړنې په ارزښت علمي خبرې وړاندې کړې.
د غونډې په پای کې هغه کسانو ته ستاينلکونه ورکړل شوه، چې د ياد ژورنال لپاره يې هلېځلې کړې وې.
یاده غونډه د شرعیاتو پوهنځي استاد مفتي نعمت الله انصاري د خیر په دعایې سره پای ته ورسېده.
نشراتو او فرهنګي کمیټه
