د فراه لوړو زده کړو مؤسسې استادانو ته د عربي ژبې یو کلن کورس پیل شو.
د څېړنو او علمي مجلې آمریت او PDC آمریت په نوښت د فراه لوړو زده کړو مؤسسې لسو تنو استادانو ته د عربي ژبې زده کړې یو کلن کورس پرانیستل شو.
د کورس پرانیسته د قرانکریم د څو مبارکو آیتونو په تلاوت سره وشو.
وروسته د څېړنې او علمي مجلې آمر پوهنیار محمدحسین میاخېل لنډه وينا وکړه او زياته يې کړه، چې ياد کورس د استادانو د غوښتنې او څېړنیزې نیازسنجۍ په اساس په لاره اچول شوی او د استادانو د ظرفیت لوړونې په برخه کې د عربي ژبې د غوره زده کړې يو اساسي رول لري او په ډېرو څېړنیزو برخو کې ورته اړتیا لیدل کېږي.
او په پای کې د فراه لوړو زده کړو مؤسسې رئیس مولوي سميع الله حقاني د عربي ژبې د ارزښت او اهمیت په هکله د کورس په پرانیسته کې هر اړخیزه وینا وکړه او د څېړنې آمریت او PDC آمریت دغه نوښت یې د څېړنیزو چارو ترسره کولو او نورو علمي چارو لپاره اړین وباله.
چې تر پرانیستې وروسته رسماً د کورس ښوونېز بهیر پیل شو.
د یادونې وړ ده، چې د یاد کورس ښوونېزې چارې د يادې مؤسسې رئیس مولوي سمیع الله حقاني له لوري ترسره کيږي.
